Kuvendi: Miratohet me 102 vota ligji për pakicat kombëtare

Pas një seance maratonë nisur rreth orës 8 e 30 të mëngjesit, Kuvendi  ka votuar në orët e vona të së premtes ligjin për mbrojtjen e pakicave kombëtare.

Në përfundim të seancës pas diskutimeve të shumta nga deputetët, ky ligji  u miratua me 102 vota pro, 10 kundër dhe 1 abstenim.

Gjatë votimit nen për nen, kryetari i PBDNJ-së, Vangjel Dule ka propozuar disa amendamente, me pretendimin se ky ligj karakterizohet nga mosnjohja e legjislacionit tonë dhe konventave ndërkombëtare.
“Karakterizohet nga fobi dhe reminishenca të Luftës së Ftohtë. Misioni i këtij ligji nuk përmbushet dhe kemi kthim mbrapa në disa nene”, ka thënë Dule. Por në vijim të votimit amendamentet e tij janë rrëzuar.

Kështu sipas ligjit, pakicat kombëtare në Republikën e Shqipërisë janë pakicat greke, maqedonase, vllahe/arumune, rome, egjiptiane, malazeze, boshnjake, serbe dhe bullgare.