Lista Serbe në përkrahje të Isa Mustafës
Përderisa blloku LDK, AAK dhe Nisma, si dhe PDK-ja po bëjnë përpjekje për mbledhjen e sa më shumë votave për seancën e 12 shtatorit, lista Serbe tashmë ka dalë në përkrahje të Isa Mustafës.
Zyrtarë të kësaj partie i kanë thënë Radio Kosovës se në seancën e së premtes kjo listë do të votojë pro Isa Mustafës për kryetar të Kuvendit.
Aktorët politik i kanë shtuar intensivisht bisedimet ditëve të fundit në përgatitje të seancës së 12 shtatorit, ku pritet të zgjidhet edhe kryetari i Kuvendit.
Blloku LDK, AAK, Nisma së fundi i kanë përafruar qëndrimet e tyre për nënshkrimin marrëveshjes, në mënyrë që edhe Vetëvendosje t`i bashkohet koalicionit pas zgjedhor.
Në anën tjetër, lista serbe tashmë ka konfirmuar se do ta përkrah kandidatin që do të nominohet nga koalicioni LDK, AAK dhe Nisma.
Këtë e ka konfirmuar për Radio Kosovën, vet kryetari listës Serbe Aleksander Jablanoviq, i cili ka thënë se kjo listë edhe më 17 korrik e ka votuar Isa Mustafën për kryetar të Kuvendit.
“Këtyre ditëve nuk kemi pasur asnjë takim me përfaqësuesit e partive politike shqiptare. Ajo që për ne është me rëndësi dhe pozicioni ynë është që më herët kemi pasur kontakte me Bllokun dhe tani qëndrimi I Listës serbe për mbështetje të kandidatit për kryetar të Kuvendit, Isa Mustafa, nuk ka ndryshuar”, ka thënë ai.
Jabllanoviq, pret që më 12 shtator të zgjidhet kryetari dhe kryesia e Kuvendit në mënyrë që të shmanget kriza institucionale në Kosovë.
Ndryshe, Gjykata Kushtetuese e Kosovës kishte vendosur që zgjedhja e Isa Mustafës më 17 korrik ishte antikushtetuese dhe se vetëm PDK, si partia që fitoi më së shumti vota, mund të nominojë kandidat për kryetar të Kuvendit.
Mirëpo, vendimi i kushtetueses nuk shpjegon se në rast të dështimit të përzgjedhjes së kandidatëve për Kryetar të Kuvendit në herën e parë, kush e ka të drejtën për të propozuar kandidatin.
