Lu: Korrupsioni pengon funksionimin e drejtësisë

Ambasadori amerikan Donald Lu e shmangu një referim të drejtëpërdrejtë tek reforma në drejtësi kur foli për perceptimin e korrupsionit, por nuk shmangu ndikimin që korrupsioni ka tek dhënia e drejtësisë.

Ai mori shkas nga një rast kur një gjyqtar i kishte dhënë të gjithë pasurinë dhe kujdestarinë e fëmijëve jo nënës, por babait të denoncuar për dhunë dhe të dënuar më parë për krime seksuale.

“Korrupsioni në drejtësi jo vetëm i lejon gjyqtarët dhe politikanët që të pasurohen. Të fortët dhe të pasurit e blejnë drejtësinë, të varfërit janë vktimat”, deklaroi Lu.

Sipas sondazhit të financuar nga Ambasada Amerikane, perceptimi i korrupsionit në Shqipëri mbetet shumë i lartë, në kuotën 89 për qind. Por ka një përmirësim tek përvoja direkte e qytetarëve me korrupsionin.

Në krahasim me të njëjtin sondazh të 5 viteve më parë, ky tregues ka pësuar rënie nga 57 për qind në 44 për qind. Policia ka treguesit më të mirë dhe është institucioni i vetëm me besueshmërinë mbi 50 pikë nga 100 të mundshme.