Maloku: Kosovës nuk i duhet koalicioni PDK-LDK

Njohësi i proceseve politike, Fadil Mloku, ka vlerësuar se mund të ketë pasoja të pariparueshme për Kosovën në rast se qeveria e re varet nga votat e Listës Serbe. Sipas tij, nëse ndodh diçka e tillë, Kosovën e pret kantonizimi ose ndarja.

“Më së paku kantonizimi, më së shumti ndarja të cilën jam duke e parë në horizont”, ka deklaruar Maloku.

Dhe, për ta shmangur një situatë të tillë, ai ka insistuar se Kosova duhet të shkojë në zgjedhje të reja.

Maloku ka deklaruar se Kosovës i duhet një qeveri e privuar nga verbëria për pushtet, por assesi një koalicion qeverisës PDK-LDK.

“Koalicioni më i panatyrshëm, më i dëmshëm, më absurd dhe më i keq për Kosovën do të ishte ai në mes të LDK-së dhe PDK-së”, ka thënë Maloku.