Mark Frroku mbetet në burg, gjykata heq e vendos masën e sigurisë
Avokatët e Mark Frrokut, ish-deputetit të akuzuar për një vrasje të kryer në Belgjikë në vitin 1999 ndaj shtetasit shqiptarë Aleksandër Kurti, i kërkuan Gjykatës së Tiranës shuarjen e masës së sigurisë arrest me burg për klientin e tyre.
Gjykata pranoi të shuajë masën e sigurisë së vendosur më parë nga Gjykata e Lartë, por në të njëjtën kohë pranoi kërkesën e Prokurorisë së Tiranës për vendosjen e së njëjtës masë sigurie, tanimë nga gjykata kompetente, që do të gjykojë çështjen.
Dosja e Frrokut mbërriti në Gjykatën e Tiranës nga Gjykata e Lartë, pasi kjo e fundit shpalli moskomptencën pas heqjes së mandatit të deputetit.
Përveç akuzës së vrasjes, Prokuroria ka ngritur ndaj Frrokut edhe akuzat e fshehjes së pasurisë dhe ndërtim pa leje. Së bashku me Frrokun për akuzën e vrasjes, është i pandehur edhe shtetasi tjetër, Kristian Marjani, i cili po gjykohet në mungesë.
