Mbyllet shqyrtimi gjyqësor për ish-gjyqtaren e akuzuar për korrupsion

Gjykata e Lartë ka mbyllur shqyrtimin gjyqësor ndaj ish-anëtares së kësaj gjykate Majlinda Andrea, e cila akuzohet për korrupsion pasiv. Vendimi për ish-gjyqtaren Andrea do të jepet në datën 12 qershor.

Prokuroria ka kërkuar 4 vite burg për Majlinda Andrean, e cila akuzohet për korrupsion në lidhje me një vendim për njohjen e një prone prej 40 hektarësh në Butrint. Organi i akuzës ka kërkuar ndër të tjera që t’i hiqet për 5 vite e drejta për të ushtruar funksione publike.

Ish-gjyqtarja dhe bashkëshorti i saj Odise Andrea akuzohen për korrupsion. Ajo akuzohet se ka dhënë një vendim për njohje pronësie kundrejt një shume parash prej 50 mijë eurosh.

Bashkëshorti i saj, Odhise Andrea, ka komunikuar me sekserin Petraq Dashi dhe i ka kërkuar atij 50 mijë euro për marrjen e vendimit në favor të tij për pronën në Sarandë. Trualli pretendohej nga Ilia Çabiri dhe Eleni Lino, të cilin kishin nisur edhe procesin gjyqësor ku gjyqtare ishte Majlinda Andrea. Po ashtu, Prokuroria ka kërkuar 4 vjet për Petraq Dashin, 2 vjet për Ilia Cabiri dhe 1 vit për Eleni Linon.