Më thjesht për të blerë bono
Në fund të këtij viti, pjesëmarrja në ankandet e bonove dhe obligacioneve do të jetë më e thjeshtë.
Pjesëmarrësit nuk do të kenë nevojë të mbajnë depozita në cash në Bankën e Shqipërisë, por për këtë qëllim do të përdorin llogaritë që kanë në bankat tregtare.
Pjesëmarrja në ankande do të bëhet përmes llogarive bankare, falë një sistemi elektronik që po ngrihet në zbatim të një projekti të përbashkët mes bankave dhe Bankës së Shqipërisë.
Individët dhe subjektet do të mbajnë në Bankën Qendrore vetëm llogarinë e titujve, ndërsa të gjitha veprimet cash do të kryhen përmes bankave.
Kjo përfaqëson një lehtësi të konsiderueshme, sepse do të ulë ndjeshëm fluksin e klientëve në sportelet e Bankës së Shqipërisë për veprime cash, duke i adresuar këto veprime në bankat tregtare, që kanë infrastrukturë më të zgjeruar dhe më të përshtatshme.
Sistemi i ri pritet të nisë në muajin dhjetor, duke ua bërë individëve më të lehtë aksesin në një nga instrumentet kryesorë të investimit financiar. Në fund të qershorit 2014, individët zotëronin rreth 12% të stokut të borxhit të brendshëm publik.
