Meta në Vjenë: BE-ja nuk duhet ta shohë Ballkanin si një lagje, por si rajon të integruar jugor

Gjatë vizitës së tij në Austri, Kryetari i Kuvendit, z. Ilir Meta, mori pjesë në konferencën e fokusuar në zhvillimet më të fundit në Ballkan  në kuadër të zhvillimeve globale me temë “Brexit, be, shba dhe roli i Shqipërisë për stabilitetin dhe sigurinë në rajon”. Në këtë aktivitet, që u organizua nga Instituti “Karl-Renner”, Akademia Diplomatike e Vjenës në bashkëpunim edhe me Ambasadën e Republikës së Shqipërisë në Vjenë, ishin të pranishëm edhe Kryetarja e Komisionit për Politikën e Jashtme, znj. Arta Dade, Kryetari i Grupit Social-Demokrat në Parlamentin e Austrisë, z. Andreas Schieder, Drejtori i Akademisë Diplomatike të Vjenës, z. Hans Winkler, etj.

Në fjalën e mbajtur në këtë konferencë, Kryetari i Kuvendit shprehu besimin tij të palëkundur se një Bashkim Europian i fortë dhe një koalicion trans-atlantik solid janë platforma më e mirë që ne të gjithë së bashku duhet të promovojmë dhe të forcojmë.

“Shqipëria mbështet plotësisht 3 prioritetet kyçe të Kryesisë Austriake të OSBE-së, gjatë vitit 2017 – duke ofruar mbështetjen tonë në drejtim të zbutjes së konflikteve të vazhdueshme, duke luftuar kundër çdo tendence fetare radikale në rajonin tonë dhe sigurisht duke punuar për forcimin e institucioneve tona, gjë që do të ndihmojë për kthimin e besimit të qytetarëve tek institucionet qeverisëse”, – tha z. Meta, duke shtuar se në situatën aktuale të sigurisë është e domosdoshme që të kemi një perspektivë të besueshme anëtarësimi për të gjithë Ballkanin.

“Konkretisht, kjo do të thotë që dera e integrimit të mbetet e hapur dhe BE-ja të mbetet konkretisht dhe në mënyrë aktive e angazhuar me secilin prej vendeve tona dhe me të gjithë rajonin politikisht dhe ekonomikisht. Nisma e Procesit të Berlinit, e nisur në vitin 2014 në Berlin dhe që vazhdoi në vitin 2015 në Vjenë, si një nismë e shkëlqyer e bashkëpunimit ndërqeveritar, jo vetëm ka rigjallëruar lidhjet mes rajonit tonë dhe një sërë vendesh anëtare të BE-së, por dhe i ka hapur rrugën një platforme të mirë ndërlidhjeje rajonale, sidomos në aspektin e zhvillimit infrastrukturor dhe ekonomik”, – theksoi Kryetari i Kuvendit.

Gjithashtu, z. Meta tha se BE-ja nuk duhet ta shohë Ballkanin si një lagje, por si një rajon të integruar jugor, duke vepruar si një familje më e koordinuar dhe më të përgatitur për zhvillimet e ardhshme potencialisht destabilizuese, të përmasave shumë të mëdha njerëzore.

“Megjithatë, duke qenë se këto sfida testojnë solidaritetin dhe koherencën europiane, BE-ja nuk duhet ta shohë Ballkanin si një lagje – por duhet ta shohë si një rajon të integruar jugor – duke vepruar si një familje më e koordinuar dhe më të përgatitur për zhvillimet e ardhshme potencialisht destabilizuese, të përmasave shumë të mëdha njerëzore. Ne jemi me fat që Austria, e cila e njeh shumë mirë nga brenda këtë rajon, i kupton tërësisht përfitimet pozitive të një axhende europiane në rajonin tonë”, – vijoi Kryetari Meta, duke u ndalur më tej në zhvillimet në Shqipëri dhe sfidat që ka vendi. Z. Meta u shpreh se Shqipëria po ecën përpara në mënyrë të qëndrueshme në rrugëtimin e saj drejt integrimit europian dhe se është një shembull pozitiv që dëshmon se integrimi në BE mund të shërbejë si një motor për procesin e reformave në vend.

“Mund t’ju siguroj se përsa i takon Shqipërisë, ne po bëjmë pjesën tonë për të rritur standardet e qeverisjes dhe ti tregojmë rezultate konkrete miqve dhe partnerëve tanë europianë. Siç mund ta dini, Shqipëria po ecën përpara në mënyrë të qëndrueshme në rrugëtimin e saj drejt Integrimit Europian, pavarësisht sfidave të saja dhe lodhjes nga zgjerimi me të cilën po përballet BE-ja. Shqipëria është një shembull pozitiv që dëshmon se integrimi në BE mund të shërbejë si një motor për procesin e reformave në vend”, – deklaroi Kryetari i Kuvendit, ndërsa vlerësoi rolin e reformës historike në drejtësi për forcimin e shtetit të së drejtës dhe krijimin e një sistemi të paanshëm e transparent.

“Së fundmi, Shqipëria ka marrë një rekomandim pozitiv nga Komisioni Europian për hapjen e bisedimeve të pranimit për anëtarësimin në BE, gjë që u përsërit nga vendet anëtare në takimin e dhjetorit të Këshillit Europian në Bruksel, me kushtin që vendi të përparojë me zbatimin e “Reformës vendimtare dhe historike në Drejtësi”, e cila do të rindërtojë të gjithë sistemin e drejtësisë dhe shpresojmë ta riorganizojë për mirë. Kjo reformë kushtetuese historike, nëse zbatohet siç duhet, do të forcojë shtetin e së drejtës, do të krijojë një sistem drejtësie më të paanshëm, do të na detyrojë ne politikanëve që të tregojmë më shumë transparencë në mënyrën se si qeverisim dhe do të krijojë llogaridhënie të plotë në jetën publike, gjë që është shumë e nevojshme”, – u shpreh Kryetari i Kuvendit, z. Ilir Meta.

Sakaq, z. Meta tha se ka punuar për të nxitur klasën tonë politike drejt një qasjeje më konsensuale ndaj reformave të rëndësishme. “Nën përgjegjësinë time si Kryetar i Kuvendit të Shqipërisë, kam punuar për të nxitur klasën tonë politike drejt një qasjeje më konsensuale kur trajtojmë reforma të brendshme kaq të rëndësishme, të cilat në fund të fundit ndikojnë në politikën tonë rajonale dhe të jashtme”. Në fund, Kryetari i Kuvendit foli edhe për Kosovën, duke theksuar se Shqipërisë do të vazhdojë lobojë për më shumë njohje ndërkombëtare të pavarësisë.

“Shqipëria do të vazhdojë të lobojë edhe më fortë për më shumë njohje ndërkombëtare të pavarësisë së Kosovës, ndërkohë që do të shtyjmë përpara axhendën e integrimit të saj në organizatat rajonale dhe ndërkombëtare. Kjo është e domosdoshme për qytetarët e Kosovës dhe jetike për të gjithë rajonin”, – tha z. Meta. Ndërkaq, gjatë konferencës Kryetari i Kuvendit, iu përgjigj edhe pyetjeve të shumta të pranishmëve lidhur me këtë temë.