Meta takon Varhelyin: E informova se do rikthej për rishqyrtim në Kuvend ndryshimet e Kodit Zgjedhor, çdo zgjidhje do të vijë nga populli shqiptar
Presidenti Ilir Meta ka zhvilluar një takim në presidencë me Komisionerin për Zgjerimin, Oliver Varhelyi. Meta shprehet se e ka informuar komisionerin se rikthejë për rishqyrtim në Kuvend ndryshimet e Kodit Zgjedhor, duke shtuar se zgjidhjet do të vijnë vetëm nga populli shqiptar.
Postimi i presidentit Ilir Meta:
Kënaqësi të takohesha me Komisionerin për Politikën e Fqinjësisë Europiane dhe Negociatat e Zgjerimit, z. Oliver Varhelyi.
E falenderova për të gjitha përpjekjet e tij dhe të institucioneve europiane për të mbështetur integrimin europian të Shqipërisë.
Duke u ndalur tek reforma zgjedhore, përcaktuar si kusht themelor për nisjen e negociatave të anëtarësimit, e informova Komisionerin se do të rikthej për rishqyrtim në Kuvend ndryshimet e njëanshme të Kodit Zgjedhor.
Duke mirëkuptuar kërkesën dashamirëse të Grupit të PPE në Parlamentin Europian për t’i dhënë edhe një mundësi Kuvendit një-partiak të tërhiqet nga minimi i procesit zgjedhor, me pasoja të rënda e afatgjata ndaj integrimit europian të Shqipërisë, uroj që pushteti të kthehet tek Marrëveshja konsensuale e 5 Qershorit.
E garantova Komisionerin Varhelyi se çdo zgjidhje do të vijë nga populli shqiptar.
25 Prilli do të jetë një referendum popullor që do t’u japë përgjigjen e merituar të gjithëve atyre që tentojnë të luajnë me të ardhmen europiane të vendit.
