Ministri serb kërcënon Kosovën: Të gjitha opsionet në tryezë, do mbrojmë vendin!
Policia e Kosovës hyri në ndërtesat komunale të Zveçanit, Zubin Potokut dhe më pas Leposavicit –komuna të banuara me shumicë serbe – pavarësisht rezistencës së një grupi qytetaresh. Kreret e policisë nënvizuan se në këtë mënyrë po ndihmonin kryetarët e rinj të komunave të veriut të Kosovës që të hynin në objektet zyrtare, një ditë pasi kishin bërë betimin.
Për shkak të zhvillimeve të së premtes në veri të Kosovës, presidenti serb Aleksandar Vuçic dha urdhër për ngritjen e gatishmërisë luftarake të Ushtrisë së Serbisë në nivelin më të lartë. Vuçevic deklaroi se “është duke u zhvilluar përpjekja për të pushtuar të gjitha komunat në veri të Kosovës nga të ashtuquajturit liderë komunalë, absolutisht jolegjitimë dhe të zgjedhur ilegalisht”.
Ai u ankua se reagimi i KFOR-it (Misioni i NATO-s në Kosovë) dhe EULEX-it (Misioni i BE-së për Sundimin e Ligjit) ishte i butë.
“Ushtria e Serbisë është në kontakt me KFOR-in dhe ne presim që KFOR të jetë shumë më i përfshirë në terren”, tha ai për RTS-në duke shtuar Serbia do të gjejë një “përgjigje adekuate, para së gjithash politike” për situatën, por nuk përjashton as ndonjë përgjigje tjetër që do të jetë adekuate për rrezikun që i kanoset vendit tonë dhe qytetarëve tanë.
