Ministrja Kodheli: Tunelet e Klosit, jo më të rrezikshme

Pastrimi nga armët dhe kontaminimet kimike në tunelet e zonës së Klosit ka bërë që kjo zonë të kthehet në një atraksion edhe për bizneset.

Lajmi bëhet me dije nga vetë ministrja e Mbrojtjes, Mimi Kodheli, që përmes një postimi në faqen e saj Facebook, sqaron se pjesëtarët e Komandës Mbështetëse janë marrë me pastrimin e këtyre tuneleve nga rreziku kimik që mbartnin, duke i kthyer në zona efiçente.

“Në këto tunele plot municione në Klos, fare pranë banesave dhe rrugës nacionale, në vitin e mbrapshtë 1997 ndodhi një shpërthim dhe ato u kontaminuan. Për ta mbyllur këtë “muhabet”, tunelet u mbyllën, u betonuan. Por nuk u zhduk rreziku, përkundrazi. Proceset kimike dhe reaksionet shpërthyese mund të ndodhnin në çdo çast. Për këtë vendosëm t’i pastrojmë njëherë e mirë. Pjesëtarët e Komandës Mbështetëse kane bërë një punë sa të rrezikshme, aq edhe të mrekullueshme atje. Aq sa tani bizneset private po na i kërkojnë me qira për të ushtruar aktivitetin e tyre”, shkruan Kodheli.