Miratohet marrëveshja për financimin e projektit “Rezervati ndërkufitar i biosferës në Prespë”

Komisioni i Jashtëm miratoi sot marrëveshjen për financimin e projektit “Rezervati ndërkufitar i biosferës në Prespë” si dhe  marrëveshjen që realizon ndihmën e përvitshme të Turqisë për modernizimin e Forcave të Armatosura të Shqipërisë.

Të ftuar në komision për të paraqitur  dy marrëveshjet ishin, Zëvendësministri  i Mbrojtjes Petro Koci, si dhe  Drejtoresha  e Drejtorisë së Integrimit në BE dhe koordinimit te projekteve, në Ministrinë e Mjedisit,  Ardiana Sokoli.

Zëvendësministri Koçi tha se marrëveshja për  bashkëpunimin financiar ushtarak, ndërmjet KM të RSH dhe Qeverisë së Republikës së Turqisë, dhe protokollit të zbatimit për asistencën financiare, ndërmjet KM të RSH dhe Qeverisë së Republikës së Turqisë, parashikon dhurimin  e të përvitshme nga qeveria e Turqisë  në shumën 2 milion e  pesëqind mijë lira turke.

Sipas Koçit kjo shumë do të ndahet në dy pjesë, dy milionë e treqind e pesëdhjetë mijë lira turke për blerjen e mallrave dhe shërbimeve që do ti shërbejnë  modernizimit të FA , ndërsa pjesa tjetër njëqind e pesëdhjetë mijë lira turke  do të shërbejë për të përballuar vizitat dhe trajnimet e personelit të FA, në Turqi.

Në fjalën e saj, Drejtoresha  e Drejtorisë së Integrimit në BE dhe koordinimit te projekteve, në MM,  Ardiana Sokoli  u shpreh se  marrëveshja, ndërmjet KM të RSH dhe Qeverisë së Republikës Federale të Gjermanisë, për bashkëpunimin financiar 2013, për projektin “Rezervati Ndërkufitar i Biosferës në Prespë”, synon  investimin e mëtejshëm në Parkun Kombëtar të Prespës, me qëllim përfitimin e popullsisë lokale, ruajtjen e diversitetit, si dhe mbështetjen kryesore për zhvillimin e rezervës biosferë. Pas diskutimeve, anëtarët e komisionit  u shprehën dakord për kalimin e tyre në seancë plenare.