MM zhvillon homazhe në nderim të ish-komandantit të Aviacionit Luftarak shqiptar, Bardhyl Taçi
Në hollin kryesor të Muzeut të FA u zhvilluan homazhe në nderim të ish – komandantit të Aviacionit Luftarak Shqiptar, Bardhyl Taçi, i cili ndërroi jetë pas një sëmundje të rëndë në Shtetet e Bashkuara të Amerikës, ku jetonte me familjen e tij prej disa vitesh.
Për të nderuar jetën dhe punën e këtij ish – piloti dhe ish – ushtaraku të lartë të FA shqiptare bënë homazhe me dhjetëra e qindra ish – pilotë, veteranë dhe ushtarakë aktivë të Forcës Ajrore, kolegë dhe ish – ushtarakë të Ushtrisë Shqiptare që kanë punuar dhe shërbyer ndër vite me të ndjerin Bardhyl Taçi.
Në nderim të tij bëri homazhe zv/ministri i Mbrojtjes, Petro Koçi, shefi i Shtabit të Përgjithshëm i FA, gjeneralmajor Jeronim Bazo, ish – ministrat e Mbrojtjes, Pandeli Majko dhe Gazmend Oketa, deputetë të Kuvendit të Shqipërisë, ushtarakë dhe punonjës të Ministrisë së Mbrojtjes dhe Shtabit të Përgjithshëm etj.
Me këtë rast, ministrja e Mbrojtjes, Mimi Kodheli, i dërgoi një letër ngushëllimi familjes së Badhyl Taçit, në të cilën ka vlerësuar lart figurën e këtij piloti të shquar të aviacionit dhe ushtaraku të lartë të ushtrisë shqiptare, i cili për gati 15 vjet radhazi drejtoi armën Aviacionit Luftarak Shqiptar.
Bardhyl Taçi lindi në vitin 1933 në Lavdar të rrethit të Korçës. Në vitet 1951 – 1955 ai studjoi në Shkollën e Aviacionit “Çkallov” në ish – Bashkimin Sovjetik dhe më pas, me gradën e togerit, filloi punë si plot i Mig – 15 në Regjimentin e Aviacionit në Kuçovë. Pas një specializimi tjetër në ish – BS për pilot i Mig – 19 në vitin 1959, Bardhyl Taçi vijoi karrierën e tij si komandant skuadrilje dhe komandant i Regjimentit të Aviacionit në Kuçovë.
Në vitin 1972 – 1974 kreu studimet e larta ushtarake në Akademinë e Shtabit të Përgjithshëm në Tiranë dhe më pas emërohet komandant i Regjimentit të Aviacionit në Gjadër. Në vitin 1975 emërohet komandant i Aviacionit Luftarak Shqiptar, detyrë të cilën e mbajti deri sa doli në pension, në vitin 1990.
Gjatë gjithë karrierës së tij ushtarake si pilot i klasit të lartë dhe drejtues i aviacionit tonë luftarak, Bardhyl Taçi u shqua nga një sjellje shembullore me të gjithë, autoritet dhe aftësi të lartë profesionale, si dhe për një dashuri dhe përkujdesje të jashtëzakonshme për armën e aviacionit dhe personelin që shërbente në këtë armë të lavdishme ushtrisë shqiptare.
