Morën peng e dhunuan 19-vjeçarin, policia procedon autorët

Akuzohen se morën peng 19-vjeçarin nga Peqini, komisariati i Policisë së Sarandës nis procedim penal në gjendje të lirë për tre bashkëpunëtorët. Ngjarja ka ndodhur një ditë më parë, ku tre pengmarrësit e identifikuar me inicialet A.K.,24 vjeç, E.D., 27 vjeç, e F.B., 23 vjeç kanë futur me forcë në makinë peqinsin.

Ata e kanë dërguar në një zonë që nuk kishte banorë dhe për një orë e kanë dhunuar e kërcënuar me jetë. Automjeti më të cilin kanë lëvizur ishte tip “Hundai“ , me targa greke dhe drejtohej nga 24-vjeçari A.K. Pasi e kanë lënë të lirë peqinsin, i dëmtuari e ka denoncuar kanosjen në polici, duke treguar me detaje atë që kishte ndodhur.

Menjëherë pas marrjes së kallëzimit, policia nisi procedimin penal në gjendje të lirë ndaj autorëve të dyshuar të krimit. Burimet zyrtare nuk bëjnë me dije arsyet e konfliktit mes të rinjve, por thotë se po punon për zbardhjen e plotë të ngjarjes. Ndaj të proceduarve, rëndon akuza e heqjes së paligjshme të lirisë, e kryer në bashkëpunim.