MPJ dënon djegien e flamurit në Beograd, thirrje Serbisë: Merrni masa

Ministria shqiptare e Punëve të Jashtme ka reaguar edhe për incidentet e ndodhura gjatë ndeshjes derbi në Beograd, mes Partizanit dhe Crvena Zvezdas (Yllit të Kuq), të luajtur mbrëmjen e së shtunës në kryeqytetin serb, gjatë së cilës u pa një tjetër akt i shëmtuar i përdhosjes dhe djegies së flamurit shqiptar, edhe pse këtë herë nuk kishte shqiptarë në stadium.

“Dënojmë me forcë aktin e shëmtuar të përdhosjes dhe djegies së flamurit shqiptar në ndeshjen e futbollit Partizani-Crvena Zvezda, të luajtur mbrëmë në Beograd. Konstatojmë me keqardhje, se huliganizmi i tifozerisë serbe dhe urrejtja patologjike ndaj simboleve shqiptare u shpreh sërish në Beograd, në një ndeshje që nuk kishte aspak të bënte me Shqipërinë apo shqiptarët”, ka theksuar në krye të deklaratës Ministria jonë e Jashtme.

“Gjatë ndeshjes së luajtur mbrëmë në Beograd u përsëritën sërish aktet e shëmtuara antishqiptare, ku tifozeria serbe, përveç djegies së flamurit shqiptar, shpërtheu në fyerje të rënda ndaj shqiptarëve. MPJ e Shqipërisë u bën thirrje autoriteteve serbe të vendosin para përgjegjësisë autorët e këtyre akteve, dhe klasa politike serbe të ngrihet në lartësinë e duhur e të distancohet qartë nga akte të tilla, që po marrin përmasa të pamenaxhueshme dhe me pasoja të rënda për të ardhmen dhe stabilitetin e Ballkanit” ka vijuar më tej reagimi.

Duke theksuar se futbolli dhe asnjë sport tjetër nuk duhet të shihen dhe as të fantazmohen si një mënyrë tjetër e të nxiturit konflikte midis kombeve, MPJ ka deklaruar se UEFA duhet të jetë në krye të përpjekjes esenciale për të bërë të mundur bashkëjetesën në këtë botë të globalizuar, konform vokacionit të saj dhe thirrjeve të vazhdueshme që janë bërë dhe i bëhen, jo vetëm nga sportistë, por edhe nga krerë shtetesh dhe qeverish.