MPJ përjashton nga shërbimi diplomatik konsullen në Milano

Ministria e Punëve të Jashtme bën të ditur se ka përjashtuar nga shërbimi diplomatik konsullen e Shqipërisë në Milano të Italisë.

Sipas njoftimit për shtyp të MPJ-së, Luljeta Çobanaj që prej ditës së sotme nuk “është më pjesë e shërbimit konsullor të Republikës së Shqipërisë”.

Vendimi erdhi pasi në një emision investigativ u denoncuan abuzimet në Konsullatën e Përgjithshme të vendit tonë në Milano.

“Ndërkohë për rastin në fjalë do të ketë një hetim të plotë për të identifikuar të gjitha përgjegjësitë e mundshme”, thekson Ministria më tej.

Sipas denoncimit, konsullja jepte çertifikata martese kundrejt një shume prej 1 mijë eurosh pa pasur nevojë për dokumente të tjera apo vërtetime nga njësitë administrative në Shqipëri.