Ndërron jetë kompozitori Aleksandër Lalo

Maestro Lalo i jurisë së spektaklit “C’est la Vie”, dhe lajmi është bërë i ditur pikërisht kur në TV Klan po transmetohej puntata e radhës e emisionit. “C’est la vie” është ndërprerë nga gazetari Reis Çiço, i cili ka shprehur keqardhjen e televizionit mbi vdekjen e papritur të kompozitorit, dhe ka shpjeguar se vazhdimi i spektaklit “C’est la vie” do të ishte jo-etik.

Nga ana tjetër, moderatorja e spektaklit, Marina Vjollca, ka informuar në një postim në Instagram, pak minuta më parë, mbi vdekjen e kompozitorit nga një atak në zemër, dhe se ky emision dhe emisionet në vazhdim do të ishin homazh për Maestron e ndjerë.

Aleksandër Lalo ka lindur më 27 prill të vitit 1949, në Tiranë. Rrjedh nga një familje me origjinë nga Leskoviku. Kreu studimet e larta në Institutin e Lartë të Arteve për muzikë më 1973. Lalo është edhe një nga kompozitorët më të njohur dhe të dashur të muzikës së lehtë. Shumë këngë të tij ishin të dashura për rininë në kohën që u kompozuan por ato vazhdojnë me po atë sukses të rikëndohen edhe pas shumë vitesh nga këngëtarë të tjerë. Lalo si njohës shumë i mirë i orkestrës ka dhënë edhe një kontribut të madh në orkestracion, përveç kompozimeve të tij ai ka orkestruar një numër të madh të kompozimeve qofshin këto të muzikës së lehtë apo vepra.