Ndryshime në policinë e shtetit, ikën Bizhga, zv/drejtor i hetimit Haki Çaka

Kupola e policisë së shtetit është prekur nga një rokadë ndryshimesh të paralajmëruara prej kohësh. Këto ndryshime vijnë në një kohë që ministri i Brendshëm Sajmir Tahiri po zhvillon një mbledhje prej disa orësh me strukturat e larta të policisë në Drejtorinë  e Përgjithshme të Policisë së Shtetit.

Mësohet se Sokol Bizhga (me kerkesën e tij) ka lënë postin e zv/drejtorit të përgjithshëm të hetimit të krimit në policinë e shtetit për t’u transferuar në postin e drejtorit të studimeve strategjike. Në vend të tij në këtë post është emëruar Haki Çaka, i cili më parë mbante postin e drejtorit të policisë së qarkut të Gjirokastrës. Në Gjirokastër është emëruar Kastriot Skënderaj, i cili më parë mbante postin e drejtorit të policisë së Vlorës. Nërkohë Bilbil Mema, ashtu siç flitej prej kohësh është emëruar në postin e drejtorit të Shkollës së Policisë, pas pezullimit nga ky post i ish-drejtorit të përgjithshëm të policisë së shtetit Hysni Burgaj.