Në tetor forumi shëndetësor kroato-kosovar

Ministri i Shëndetësisë i Republikës së Kosovës, dr. Imet Rrahmani, gjatë një takimi sot me Ambasadorin e Republikës së Kroacisë në Kosovë, Zoran Vodopija, bisedoi për forcimin e bashkëpunimit në shëndetësi midis Kosovës dhe Kroacisë, fushat e bashkëpunimit të ardhshëm dhe përgatitjen e një Memorandumi, i cili do t’i hap rrugë një bashkëpunimi më intensiv midis dy shteteve në shëndetësi.

Rëndësi e veçantë në këtë takim i është kushtuar edhe përgatitjes së vizitës së ministrit të Shëndetësisë të Kroacisë, Sinisha Varga, i cili me një ekip të ekspertëve të njohur të fushave të shëndetësisë nga spitale të ndryshme të Kroacisë, do të qëndrojë për vizitë në muajin tetor në Kosovë, ku do të mbajë edhe Forumin Shëndetësor midis ekspertëve të fushave mjekësore nga Kosova e Kroacia.

Ministri Rrahmani mirëpriti interesimin e Kroacisë për të forcuar bashkëpunimin në shëndetësi dhe në takim është biseduar për mundësitë e shkollimit specialistik të kuadrit kosovar në Kroaci, bashkëpunimin në fushën e shërbimeve shëndetësore, partneritetit publiko privat dhe tema të tjera me interes, të cilat do të jenë pjesë e punimeve të Forumit që do të mbahet në tetor në Prishtinë, thuhet në njoftimin e MSH-së pas takimit Rrahmani-Vodopija.