Nesër merret vendimi për ish-krerët e UÇK-së, Berisha: Meritojnë pafajësinë, sytë e shqiptarëve drejt Hagës

Në prag të shpalljes së vendimit të Gjykatës Speciale në Hagë për ish-krerët e Ushtrisë Çlirimtare të Kosovës, kryetari i Partisë Demokratike, Sali Berisha, ka reaguar duke theksuar se pret një vendim pafajësie për Hashim Thaçin, Kadri Veselin, Jakup Krasniqin dhe Rexhep Selimin, të cilët i cilëson “heronj të çlirimit të Kosovës”.

Sipas tij, gjatë procesit gjashtëvjeçar nuk është paraqitur asnjë provë që mbështet akuzat për të cilat ata u arrestuan.

Në reagimin e tij, ish-kryeministri thekson se çdo vendim i gjykatës duhet respektuar, por në të njëjtën kohë kundërshton fort çdo kërcënim ndaj Kosovës, rendit dhe sigurisë së saj në rast të një vendimi të ndryshëm.

“Nesër në Hagë, gjykata, pas një procesi të zgjatur gjashtëvjeçar, shpall vendimin e marrë kohë më parë për ish-udhëheqësit politikë të Kosovës. Të gjithë ata që me interes të veçantë kanë ndjekur këtë proces, nuk kanë dëgjuar apo lexuar një provë të vetme që mbështet akuzat për të cilat ata u arrestuan. Ndaj, për çdo shqiptar, për ish-udhëheqësit politikë të Kosovës mund të ketë vetëm një vendim: pafajësinë dhe vetëm pafajësinë e tyre. Dhe urojmë që ata të kthehen të pafajshëm siç janë, kryelartë, heronj të çlirimit të Kosovës. Por kërcënimet që i bëhen Kosovës, rendit, paqes dhe sigurisë së saj në rast të një vendimi ndryshe nga Gjykata e Hagës, janë absolutisht të papranueshme, absurde dhe të dënueshme. Kosova nuk mund të paguajë asgjë për një vendim gjyqësor të padrejtë!”, shkruan Berisha. /rtsh.al/