Ngjarja e Shushicës, Posta: Pensioni merret kundrejt deklaratës noteriale
Posta Shqiptare ka reaguar pas publikimit të problemit të pensionistëve të Shushicës në emisionin “Fiks Fare”. Në një reagim zyrar ky institucion shprehet se prej disa ditësh është marr vendimi për dhënien e pensionit, kundrejt një deklarate noteriale të pensionistit.
Në deklaratën noteriale, pensionisti duhet të deklarojë se firma e tij është e falsifikuar nga ish punonjësi i Postës.
“Ju bëjmë me dije se, duke parë kushtet në të cilat ka ndodhur ngjarja dhe duke marrë parasysh gjendjen e pensionistëve si një nga shtresat më në nevojë të shoqërisë, pavarësisht se çështja gjyqësore është ende e hapur, Posta Shqiptare prej disa ditësh ka marrë vendimin se çdo pensionist do të kompensohet, duke paraqitur pranë Filailit të Postës Vlorë një deklaratë noteriale. Për këtë fakt njoftojmë pensionistët të paraqesin sa më parë këto të fundit”, thuhet në njoftimin e Postës Shqiptare, duke theksuar se bëhet fjalë vetëm për pensioni e muajit dhjetor të vitit të kaluar.
Aktualisht, thotë Posta ish postieri Arjanit Kojdheli vazhdon të jetë në hetim, ndërsa drejtoresha e Filialit të Vlorës në atë kohë, Ramona Jaho u shkarkua nga detyra.
Një ditë më parë, pensionistët deklaruan në emisionin invetigativ “Fiks Fare” se prej një viti nuk kanë marrë pensionin.
Pensionistët thonë se në dhjetor të një viti më parë, personi që shpërndante pensionet në postë u arrestua për abuzime me paratë e energjisë dhe për këtë arsye pensionistëve të 3 fshatrave nuk u kaloi pensioni për muajin dhjetor.
