Nis “Tetori gjerman”, Hoffman: Sukses i padiskutueshëm

Ambasada gjermane çeli siparin e aktiviteteve te “Tetorit Gjerman” në Shqipëri. Për të nëntin edicion radhazi, edhe këtë fillim vjeshte, ambasadori gjerman e cilësoi programin si sukses të padiskutueshëm.

“Ideja qendrore e tetorit gjerman është një ide konkrete, pikërisht bërja bashkë e njerëzve nga vende të ndryshme, lidhja dhe zgjerimi i rrjeteve të këtyre lidhjeve, si dhe të mësojmë më tepër për njëri-tjetrin dhe rreth njëri-tjetrit”, tha Helmut Hoffman, ambasadori gjerman në Tiranë.

Javët gjermane të këtij viti organizohen nën moton “25 vjet ribashkim i Gjermanisë, 25 vjet transformim në Shqipëri”. Teatër, filma, muzikë, forume diskutimesh dhe ekspozita, plotësojnë panoramën e programit të nëntë të Tetorit gjerman në Shqipëri, një traditë e mirëfilltë që do të na shoqërojë përgjatë dy javëve të para të këtij muaji.