OFL: 13 personave u janë sekuestruar 1 vilë, 1 karburant, 6 banesa, 3 automjete si dhe 1900 m2 truall
Në kuadër të zbatimit të ligjit special për masat pasurore ndaj individëve të dënuar apo akuzuar për krim të organizuar apo krime të rënda, OFL “Operacioni Forca e Ligjit”, u ka nisur sot kërkesat me shkrim për vetdeklarimin e burimeve të pasurisë, 2 shtetasve të tjerë.
OFL i ka dërguar kërkesën për vetdeklarimin e pasurisë shtetasit E.SH me banim në Tiranë, i cili aktualisht ndodhet i paraburgosur, pasi ndaj tij po zhvillohet gjykimi për veprat penale “shtrëngimi me anë të kanosjes për dhënien e pasurisë”, “grup i strukturuar criminal” dhe “kryerja e veprave penale nga organizata dhe grupi i strukturuar kriminal”.
Po ashtu, OFL i dërgoi kërkesën edhe shtetasit GJ. T me banim në Tiranë, pasi në vitin 2006 Gjykata e Rrethit Tiranë e ka dënuar me 10 vite burg për veprën penale “rrëmbimi ose mbajtja peng e personit”.
“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për veprime të mëtejshme”, bën të ditur OFL.
OFL që prej nisjes së operacionit e deri më sot u ka dërguar kërkesë për vetdeklarim të pasurisë 13 personave, si dhe ka sekuestruar 1 vilë, 1 karburant, 6 banesa, 3 automjete si dhe 1900 m2 truall.
