Paris, i sëmuri mendor dorëzohet pasi merr peng dy persona

Një njeri i armatosur ka marrë peng të paktën dy persona në një zyrë postare në Colombes në veri të Francës dhe pas më shumë se një ore i rrethuar nga forcat e policisë, është bindur nga negociuesit që të dorëzohet pa shkaktuar asnjë viktimë.

Policia e ka arrestuar menjëherë, ndërkohë që të dy personat që mbaheshin peng janë lëshuar pa asnjë dëmtim.

Nga informacione e para duket se episodi nuk ka lidhje me terrorizimin, por duhet të jetë epilog i ndonjë grabitjeje të dështuar. Sekuestruesi njihet nga policia dhe është cilësuar si “një njeri me probleme mendore dhe sentimentale”.

Përpara zyrës postare u formua një perimetër i rëndësishëm i sigurisë nga ana e policisë, ndërsa një helikopter vëzhgonte zonën nga ajri.

“Nuk ka asnjë lidhje me terrorizmin”, – raportojnë mediet dhe televizionet franceze, duke nënvizuar se pengmarrësi është një person që vjen pas një zhgënjimi në dashuri.

Colombes ndodhet në departamentin Hauts-de-Seine, në periferi të Parisit.