PBDNJ nis tërheqjen nga postet në qeveri

Zv.ministri i Jashtëm, Alqi Puli kërkon dorëheqjen te Dule

Nga Artemisa Hoxha

Zëvendësministri i Jashtëm në radhët e Partisë Bashkimi për të Drejtat e Njeriut, Alqi Puli, pritet të lërë këtë post, pas kërkesës që ka paraqitur në zyrën e kreut të PBDNJ-së, për dorëheqjen e tij. Lajmi është konfirmuar nga vetë zoti Puli, i cili në një prononcim për gazetën “Shqip”, sqaron edhe arsyet e lënies së këtij posti, teksa shton se kërkesa për dorëheqjen e tij ndodhet në zyrën e kreut të PBDNJ-së, Vangjel Dule, dhe ende nuk është dorëzuar në sekretariatin e Ministrisë së Jashtme. E teksa këshilli kombëtar i OMONIA-s, pas miratimit në Kuvend të reformës administrativo-territoriale, ndarje e cila pjesërisht është kundërshtuar nga PBDNJ-ja, ka vendosur ngrirjen e dorëheqjeve në administratë të përfaqësuesve të partisë në koalicionin qeveritar, Puli nuk mohon se një nga arsyet e dorëheqjes ka të bëjë edhe me këtë qëndrim. Ndërkohë që burime pranë Ministrisë së Jashtme bëjnë të ditur se deri dje, zëvendësministri i Jashtëm, Puli, ka qenë në detyrë dhe se deri më tani nuk ka asnjë kërkesë të tij për dorëheqjen nga ky post. “Është i vërtetë lajmi që unë kam kërkuar dorëheqjen nga posti i zëvendësministrit të Jashtëm. Kërkesa ndodhet në zyrën e kryetarit të PBDNJ, z. Vangjel Dule. Tashmë është në dorë të tij kjo kërkesë nëse do të dorëzohet në ministri në kuadër të bashkëpunimit qeveritar. Arsyeja e dorëheqjes është për çështje të ndryshme, ku njëra prej tyre është dhe vendimi i këshillit të OMONIA-s. Ende nuk ka një vendim zyrtar për marrëdhëniet me qeverinë”, thotë zëvendësministri i Jashtëm. Nga ana tjetër, Puli sqaron se një tjetër arsye e largimit të tij nga ky post ka të bëjë me faktin e kandidimit të tij si kryetari i organizatës së pakicës greke në vendin tonë OMONIA. “Por, nga ana tjetër, është i vërtetë edhe lajmi që do të kandidoj për kreun e OMONIA-s”, tha zv.ministri i Jashtëm për gazetën “Shqip”. Aktualisht në krye të OMONIA-s është Vasil Bollano, i cili u rizgjodh në janar të 2011-s sërish në krye të kësaj organizate me një mandat trevjeçar, mandat që mbaron këtë vit. Ndërkohë që pas miratimit të reformës territorialo-administrative, OMONIA i ka kërkuar PBDNJ-së që të ngrijë dorëheqjet në administratën shtetërore. Kjo organizatë, ka kërkuar pak kohë më parë që dorëheqjet e përfaqësuesve të PBDNJ-së nga postet e larta t’i shtyjë “deri në mbledhjen e këshillit të përgjithshëm drejtues të OMONIA-s dhe PBDNJ-së, ku do të vendoset për të ardhmen e bashkëpunimit me koalicionin qeverisës. Pas emërimit të Vangjel Dules në postin e nënkryetarit të Kuvendit, kësaj partie iu dhanë edhe tri poste zv.ministrash. Jani Babi, zëvendësministër i Bujqësisë, Zhvillimit Rural dhe Administrimit të Ujërave, Oljana Ifti, zëvendësministre e Mjedisit dhe Alqi Puli, në postin e zv.ministrit të Punëve të Jashtme, janë tre përfaqësuesit e PBDNJ-së në nivelin e dytë të qeverisjes. Por, gjatë ditës së djeshme, dy partitë minoritare, Partia Bashkimi për të Drejtat e Njeriut dhe Partia e Minoritetit Etnik Grek për Ardhmërinë, janë takuar në Sarandë për të diskutuar edhe mundësinë e një bashkimi të tyre. Mësohet se takimi është në kuadër të organizimit të një aktiviteti përgatitor për kongresin e OMONIA-s. PBDNJ-ja drejtohet nga Vangjel Dule, ndërsa Kristo Kiço ka drejtuar MEGA-n. Ende nuk ka asnjë qëndrim zyrtar nga kjo mbledhje me mundësin e largimeve të punonjësve të PBDNJ-së nga administrata shtetërore, që do të sillte kështu largimin e PBDNJ-së nga koalicioni qeveritar.

Deklarata