PD i thotë sërish “JO” Dukës, deputeti i PR pyet sot bazën për të hyrë i vetëm në garë
Deputeti i Partisë Republikane, Agron Duka ka marrë dje një tjetër ‘JO’ nga Partia Demokratike për të kandiduar si përfaqësues i opozitës në Bashkinë e Durrësit.
Burimet bëjnë të ditur se gjatë negociatave të zhvilluara Edmond Spaho dhe Eduard Halimi kanë përdorur si argument të refuzimit të kandidaturës së Dukës faktin se Durrësi është një bashki e madhe dhe si e tillë duhet të ketë në garë një përfaqësues të PD-së.
Nga ana tjetër vetë Duka gjatë këtij takimi ka mbrojtur kandidaturën e tij me shifrat e sondazheve që janë zhvilluar. Sipas tij të gjithë treguesit janë që është fitues përballë Vangjush Dakos nëse mbështetet nga Partia Demokratike.
Pas këtij refuzimi vetë Duka ka vendosur të zhvillojë sot një takim me rreth 300 anëtarë të Partisë Republikane ku do ti informojë për negociatat e deritanishme me Partinë Demokratike si dhe do ti pyesë nëse ai mund të hyjë në garë megjithëse nuk do të ketë mbështetjen e PD-së.
