Ashtu siç ishte paralajmëruar, mijëra shqiptarë nisën protestat e tyre në Shkup, kundër vendimit për dënimin me burgim të përjetshëm të gjashtë shqiptarëve për rastin e quajtur “Monstra”. Pavarësisht se sot Maqedonia ishte përgatitur për një konflikt të mundshëm mes shqiptarëve dhe forcave të policisë, protestuesit u shpërndanë të qetë pas protestës dhe nuk pati asnjë konfrontim me ta.
Mijëra protestues të qetë nga të gjitha viset shqiptare në Maqedoni, pas protestës që zgjati një orë, filluan të shpërndahen pranë qendrës tregtare “Mavrovasja”. Aty gjatë gjithë kohës qëndroi një kordon i madh policor me autoblinda dhe mjete të tjera. Protesta filloi nga qendra tregtare Çairçanja. Gjatë gjithë kohës protestuesit shqiptare mbanin në duar pankartat : “Stop rasteve të montuara politike”, “ Radishani”, “ Sopoti” , “Monstra”.
Por pavarësisht se pjesa dërmuese e protestuesve u larguan para qendrës tregtare “Mavrovasja” në drejtim të shtëpive, një numër i caktuar të rinjsh vazhduan të qëndronin pranë policisë për një konfrontim të mundshëm. Pas shumë insistimeve mes vetë grupit, ai u tërhoq njëqind metra larg kordonit policor në drejtim të Urës së Bita Pazairit, por duke u zënë mes vete.
Me mbarimin e protestës, shqiptarët deklaruan katër kërkesat kryesore të tyre:
– Shpallja e pafajësisë për të dënuarit e rastit “Monstra”, dhe dëmshpërblimi i menjëhershëm i tyre
– Shkarkimi i menjëhershëm i prokurores dhe gjyqtares përgjegjëse për rastin “Monstra”, dhe ndjekja penale e tyre për keqpërdorimin të detyrës
– Dorëheqja e ministres së Punëve të Brendshme, për keqpërdoim të detyrës zyrtare, duke shpallur gjykimin e të akuzuarve menjëherë pas arrestimit të tyre
– Lirimin e menjëhershëm të të arrestuarve nga protestat në Shkup dhe Tetovë
[yop_poll id=”6″]
