Premtime për një arsim të unifikuar Kosovë-Shqipëri

Dy komisionet për arsim të Kosovës dhe Shqipërisë janë takuar sot për të diskutuar në lidhje me bashkëpunimet që këto dy shtete do të bëjnë të ardhmen në fushën e arsimit.

Kryetari i Komisionit parlamentar për arsim i Kosovës, Nait Hasani tha se ky takim është në vazhdën e takimeve të përbashkëta për një kurrikulë të përbashkët të arsimit fillor dhe parauniversitar.

Në anën tjetër Genc Pollo, kryetar i Komisionit për Edukim dhe Mjete të Informimit Publik të Kuvendit të Republikës së Shqipërisë tha se ky ishte një takim i frytshëm në mes dy komisioneve, duke shpresuar se edhe në të ardhmen do të takohen për të realizuara marrëveshjet që janë nënshkruar që nga viti 2006.

Pollo tha se i vjen keq edhe për gjendjen në arsim në Luginën e Preshevës, ku sipas tij atje gjendja paraqitet e rëndë.

Në takim ishte i pranishëm edhe kryetari i komunës së Bujanovcit, i cili tregoi se në Luginë ende mësohet me kurrikulën e vitit 1986.

Musliu ka kërkuar nga dy vendet që të ndihmohet arsimi shqip në Luginën e Preshevës. Komisioni parlamentar i Arsimit të Shqipërisë po qëndron në një vizitë zyrtare në Kosovë.