Presidenti Meta vlerëson me titullin “Për Merita të Veçanta Civile”, Ambasadorin e Bullgarisë, Momtchil Raytchevski

“Në vlerësim të veprimtarisë së tij të spikatur diplomatike dhe kontributit të posaçëm të dhënë për forcimin e marrëdhënieve tradicionale të shkëlqyera dypalëshe”

Presidenti i Republikës Ilir Meta, ka vlerësuar sot paradite në një ceremoni të  organizuar në presidencë, Ambasadorin e Bullgarisë, Momtchil Raytchevski me titullin “Për Merita të Veçanta Civile”.

Meta shprehet se i është përherë mirënjohës Bullgarisë mike për mbështetjen e vendosur dhe të vazhdueshme të procesit të integrimit europian të vendit tonë.

“Në vlerësim të veprimtarisë së tij të spikatur diplomatike dhe kontributit të posaçëm të dhënë për forcimin e marrëdhënieve tradicionale të shkëlqyera dypalëshe, pata sot kënaqësinë e posaçme të vlerësoja me Titullin “Për Merita të Veçanta Civile” një mik të Shqipërisë dhe popullit shqiptar, Ambasadorin e Bullgarisë, Momtchil Raytchevski”.
“Përherë mirënjohës Bullgarisë mike për mbështetjen e vendosur dhe të vazhdueshme të procesit të integrimit europian të vendit tonë, si dhe për ndihmesën e hershme dhe shumë të vyer të dhënë në Pavarësinë dhe zhvillimin e shtetit shqiptar”, shkruan Meta në Facebook.

Ambasadori Momtchil Raytchevski, ka falenderuar presidentin Meta për këtë vlerësim të veçantë dhe ka theksuar se do të jetë përherë një mik i popullit shqiptar dhe do të punojë për forcimin e marrëdhënieve midis dy popujve tanë.

Vlerësim meriton Ambasadori Raytchevski, për kontributin e dhënë në sjelljen e ekspertëve bullgarë dhe ndihmave për eleminimin e pasojave të tërmetit të vitit 2019, ndihmave për përballimin e COVID 19, sigurimin e financimeve për shetitoren në liqenin e Belshit, financimin e rikostruksionit të rrugës Bilisht-Vernit, paisjen me kompjutera dhe mjete mësimore të disa shkollave në vendin tonë, por edhe në organizimin e aktiviteteve kulturore dhe historike të cilat i kanë shërbyer njohjes dhe ofrimit midis dy vendeve.