Presidentja Jahjaga fton komunitetin rom të jetë më aktiv për kërkesat e tyre

Presidentja e Kosovës Atifete Jahjaga, kërkoi sot nga komuniteti rom që të jenë më aktivë dhe të shprehin kërkesat e tyre dhe nevojat përmes Këshillit Konsultativ për Komunitete, këshill ky që udhëhiqet nga vetë presidentja.

Gjatë një takimi me përfaqësuesit e komunitetit rom në Kosovë, që udhëhiqej nga Kujtim Paçaku, deputet i Kuvendit të Kosovës, në përbërje të të cilit ishin edhe përfaqësues të partisë politike rome dhe përfaqësues të shoqërisë civile, presidentja Jahjaga i uroi përfaqësuesit e komunitetit rom për Ditën Ndërkombëtare të Romëve duke theksuar vlerën e shoqërisë së Kosovës në respektim të diversitetit etnik, kulturor e fetar.

Sipas një njoftimi për shtyp të Presidencës, Jahjaga tha se është me shumë rëndësi integrimi i të gjitha komuniteteve që jetojnë në Kosovë, përfshirë edhe komunitetin rom, në shoqërinë dhe institucionet e vendit.

“Përmirësimi i kushteve të jetesës dhe ofrimi i perspektivës më të mirë për të gjithë qytetarët, pa dallim, është përparësi e punës së institucioneve të vendit”, u shpreh Jahjaga.

Përfaqësuesit e komunitetit rom e falënderuan presidenten Jahjaga për urimet për Ditën e Romëve dhe për pritjen në këtë ditë të shënuar për ta dhe theksuan rëndësinë e mbështetjes së institucioneve të vendit për komunitetin rom.