PS finalizon 6 ndryshimet në statut, nga mandati i kryetarit te rroga për drejtuesit e degëve

Grupi i punës për ndryshimet në statutin e Partisë Socialiste, duket se ka finalizuar 6 ndryshimet që do t’i bëhen librit të rregullave më të cilin kjo parti ka zgjedhur të funksionojë. Ndryshimi i parë dhë më i rëndësishmi është mandati i shumëpërfolur i kryetarit, i cili tashmë do të sanksionohet në statut se kur fiton zgjedhjet parlamentare automatikisht merr edhe një rinovim të mandatit në drejtimin e partisë. Në rastet, kur partia nuk fiton zgjedhjet, mbetet varianti i zgjedhjeve përmes anëtarësisë me parimin një anëtar një votë.

Ky ndryshim që pritet të miratohet në Kongresin e 19 marsit, duket se synon të fusë në shinat e ligjshmërisë statutore mandatin e Edi Ramës, i cili ka skaduar shtatorin e vitit 2013. Sipas rendit të ditës të miratuar nga Asambleja e PS-së korrikun e kaluar, në Kongres nuk parashikohet të ketë asnjë votim për kryetarin, as nga anëtarësia dhe as nga delegatët.

Tjetër ndryshim domethënës në statutin e PS-së ka të bëjë me kryetarët e degëve. Nga njëra anë, këta nuk mund të jenë më as deputetë dhe as ministra, nga ana tjetër kryetarët e degëve do të paguhen nga partia enkas për këtë detyrë.

Me ndryshimet statutore, Asambleja pritet të marrë më shumë kompetenca përsa i përket koordinimit të punëve në parti, si dhe kontrollit ndaj qeverisjes në të gjitha nivelet.

Numri i degëve pritet të reduktohet në 61, duke ndjekur numrin e bashkive në ndarjen e re administrative territoriale. Pritet gjithashtu që të zyrtarizohet edhe një nivel i ri i funksionimit të partisë në rajone, skemë mbi të cilën PS po punon prej disa muajsh duke ndarrë territorin në rajonet Shkodër-Kukës, Lezhë-Dibër, Tiranë-Durrës, Elbasan-Korçë, Fier-Berat dhe Vlorë-Gjirokastër.

Në përfundim, i ashtuquajturi Libri i Rregullave përbën ndryshimin e fundit në statut dhe synon të rregullojë marrëdhëniet e degëve me qendrën, funksionimin e grupit parlamentar dhe marrëdhëniet mes tij e ministrave, si dhe organe të tjera kolegjiale.