Qeveria e Kosovës miraton pikë të përbashkët të kontrollit kufitar me Shqipërinë

Qeveria e Kosovës në mbledhjen e sotme miratoi vendimin për pikë të përbashkët të kontrollit kufitar me Republikën e Shqipërisë, në sezonin veror.

Nga fillimi i verës në vendkalimet kufitare Kosovë-Serbi ka fluks të shtuar që pritet të shënojë rritje gjatë gjithë verës e vitit 2016 edhe krahasuar me vitet e kaluara që ishin gjithnjë me ngritje.

Mes Shqipërisë e Kosovës, më shumë se 2.7 milionë (2732089) hyrje dalje të personave kishte vetëm gjatë tre muajve të verës 2015 – në qershor, korrik e gusht.

Në vendkalimin kryesor nëpër Autostradën e kombit, në Vërmicë-Morinë, sot nga mesdita radha në dalje nga Kosova në Shqipëri është 50 metra e në hyrja 10 metra dhe kalohet pa vonesa për 2 deri 5 minuta, bën të ditur në këto momente Qendra Kombëtare për Menaxhim Kufitar.

Në dy vendkalimet tjera Kosovë-Shqipëri, Qafë të Prushit dhe Qafë të Morinës, në hyrje-dalje kalohet për 1 deri 3 minuta, pa kolona.

Qeveria e Kosovës, zhvilloi sot mbledhjen e 98-të, të 30-tën në vitin 2016, drejtuar nga kryeministri Isa Mustafa, ku u miratua edhe Nisma për lidhjen e Marrëveshjes për themelimin e Zyrës së Bashkëpunimit të Rinisë. Në këtë marrëveshje janë përfshirë gjashtë shtete të rajonit dhe selia e kësaj zyre do të jetë në Tiranë