Qeveria kanadeze lëvron 70 mijë dollarë ndihma për zonat e përmbytura
Procesi i shpërndarjes së ndihmave për banorët e zonave të prekura nga përmbytjet vazhdon nga dita në ditë, nën koordinimin e Drejtorisë së Përgjithshme të Emergjencave Civile.
Në kuadër të këtyre ndihmave, Ministria e Brendshme njofton se Qeveria Kanadeze dhe “BANKERS Petroleum” kanë levruar 70,000 dollarë kanadezë për familjet e përmbytura në Komunën Dërmenas të rrethit të Fierit. Përmes këtij fondi është mundësuar blerja e pajisjeve të nevojshme shtëpiake për 145 familje të përmbytura në fshatrat Darëzeze dhe Povelçë të Komunës Dërmenas.
Në bashkëpunim me organizatën jo-fitimprurëse “Observatori për të Drejtat e Fëmijëve” si dhe me Drejtorinë e Përgjithshme të Emergjencave Civile dhe drejtuesit e Komunës Dërmenas u identifikuan të gjitha familjet në nevojë dhe më pas janë blerë pajisjet e domosdoshme për to. Përmes këtij fondi familjet e përmbytura në Darëzezë dhe Povelçë u ndihmuan me: 265 dyshekë, 530 batanije, 530 komplete carcafësh dhe 530 jastekë.
Të gjitha produktet janë të një cilësie të lartë dhe të garantuar. Qëllimi i kësaj ndihme është që këto familje në vështirësi të mund të rikuperojnë pas emergjencës përmes produkteve cilësore duke u ofruar më tepër ngrohtësi dhe konfort për një periudhë të gjatë kohe.
Të pranishëm gjatë shpërndarjes së ndihmave kanë qenë të pranishëm Drejtuesit e Drejtorisë së Emergjencave Civile, përfaqësuesi i Ambasadës Kanadeze Marc – Antoine Dumas Attashe Politiko Ekonomik, përfaqësues të Konsullatës Kanadeze në Shqipëri, drejtues të BANKERS Petroleum, drejtues të zyrës së Observatorit, përfaqësues të Pushtetit qendror dhe vendor, si dhe deputeti i zonës Ervin Koçi.
