Rama hap “plagët e vjetra”. Berishës i kujton familjen, Bashës “rrugën”
Edi Rama e quajti “fronti i çadrës së vjetër” bashkimin e ri opozitar. Në reagimin e tij të parë pas kërkesës për dorëheqje, kryeministri tha se ata s’duan as shtet serioz, as drejtësi të drejtë, as luftë me krimin e me plagët e trashëguara prej pushtetit të tyre të vjetër.
Në një insinuatë që lidhet me situatën e krijuar së fundmi, kryeministri tha: “Nuk jemi aspak të pagabueshëm apo të paprekur nga sëmundjet e një çerekshekulli pa shtet, pa rregulla e norma dhe pa ndëshkueshmëri. Nuk jemi aspak një familje e përsosur, pa probleme e pa drurë të shtrembër në mesin tonë”, tha Rama.
Por, u shpreh ai, ndryshe nga “Fronti i çadrës së vjetër”, socialistët marrin përgjegjësi dhe mbajnë përgjegjësi për çdo gjë që nuk e bëjnë mirë.
“Në 20 vitet e fundit ka patur plot raste kur politikanë, deputetë e familjarë të tyre janë përfshirë në akuza publike. Disa herë akuzat kanë dalë të vërteta, disa herë jo”, nënvizoi Rama.
Rama i kujtoi për herë të parë Berishës dhe Bashës pas shumë kohësh çështje të tyre me drejtësinë.
“Parardhësi im në qeveri e çoi Shqipërinë buzë greminës vetëm e vetëm për të mbrojtur djalin dhe vajzën e tij. Lideri i sotëm i opozitës përdori një raport mjekësor për të djegur afatet e gjykimit për një akuzë të ngritur nga prokuroria për korrupsion”, vuri në dukje Rama.
Rama kurseu LSI-në nga akuza të ngjashme, por theksoi se përfaqëson ata që luftuan për vettingun dhe reformën në drejtësi përkundër atyre që ishin kunder.
Ai shtoi se, është plotësisht i angazhuar që vettingu të bëhet deri në fund dhe drejtësia e re më në fund të vendoset. “Për të gjithë, pa asnjë dallim”, shtoi Rama.
