Rama: PS duhet të përmbushë misionin udhëheqës për të bërë shtet në këtë vend

Partia Socialiste ka mbledhur sot Asamblenë Kombëtare, ku do të diskutohet për zgjedhjet e reja në parti dhe rinovimin e strukturave dhe anëtarësimet e reja.

Në fjalën e mbajtur në hapje të Asamblesë, kryeministri Edi Rama, njëkohësisht kryetar i PS-së, tha se në këto 30 muaj qeverisje kemi bërë shumë për PS-në, për Shqipërinë e sotme dhe atë të gjeneratës tjetër, por theksoi ai, në rrugën drejt zgjedhjeve të 2017-s na duhet një PS e reformuar, e ripërtërirë fizikisht, e riorganizuar territorialisht dhe mbi të gjitha e transformuar rrënjësisht në përbërjen e saj sociale.

Kjo, theksoi Rama, është rruga që PS mund të përmbushë misionin e saj udhëheqës për të bërë shtet në këtë vend, se reformat tona kanë hapur një rrugë të re, në një përpjekje shumë të vështirë, ku asnjë forcë tjetër veç PS-së nuk do të mund ta mbajë barrën e lidershipit.

Megjithëse, duan të na zmbrapsin dhe shkurajojnë nga rrga e reformave, vijoi kryeministri, ne do të vazhdojmë të qeverisim me kurajo dhe vendosmëri, duke fuqizuar forcën udhëheqëse të gjithë këtij transformimi të realizuar nga PS.