Bashkëkryetari i Komisionit të Posaçëm të Reformës Zgjedhore, Damian Gjiknuri ka zhvilluar sot një bisedë me Ambasadoren e SHBA-së në Tiranë, Yuri Kim, në lidhje me ecurinë e Reformës Zgjedhore.
Gjiknuri bëri të ditur se e ka informuar ambasadoren e SHBA-së në lidhje me Reformën Zgjedhore ndërsa i ka kërkuar mbështetjen e SHBA-së për të nxitur dialogun.
“Pata kënaqësinë të bashkëbisedoj sot me Ambasadoren e Shteteve të Bashkuara të Amerikës në Tiranë Yuri Kim. E informova për ecurinë e deritanishme të procesit të reformës zgjedhore dhe kërkova mbështetjen e SHBA për të nxitur dhe shtyrë përpara rifillimin e tryezës së dialogut politik, dakordësimin e çështjeve të mbetura pezull dhe përmbylljen e reformës brenda Qershorit”, shprehet Gjiknuri.
Gjiknuri thekson se “miratimi i ligjit të ri elektoral na hap rrugën më pas për arritjen e konsensusit edhe për reformimin e financimit të partive politike, parakusht për shëndoshjen e sistemit demokratik”.
Ndërkohë mbledhja online e komisionit parlamentar të Reformës Zgjedhore do të bëhet të mërkurën në orën 09:00.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.