Reliket më të bukura në thellësi të deteve
Reliket e deteve janë thesare pa kohë, të cilat kurrë nuk e humbasin bukurinë e tyre, edhe pse ndryshken. Këto fotografi të realizuara nën ujë nga të pasionuarit janë një demonstrim i tillë
Fotot e relikeve nën ujë janë vërtet të bukura: nuk bëhet fjalë për imazhe të prodhuara nga versioni i fundit i software-ve, por për shkrepje nga bota e detit, të cilat fshehin peizazhe mbresëlënëse dhe një realitet që e ëndërrojmë në momentet e relaksit.
Këto janë ndër fotografitë më të bukura me reliket detare, të cilat duket se janë harruar me kalimin e kohës! Por për shumicën e romantikëve dhe aventurierëve, ato paraqesin një thesar pa kohë!
- Kittiwake në Ishujt Cayman (Kajman)
Kittiwake ka qenë një anije e përdorur nga marina amerikane për misione nëndetëse shpëtimi. Zyrtarisht Kittiwake doli “në pension” në vitin 1994. Ajo u transferua në Ishujt Cayman (Kajman) për qëllime turistike, ndërsa më pas u fundos në vitin 2011 në ujërat e plazhit “Seven Mile”. Kjo relike prej 76 metrash gjatësi paraqet një “pre” të lehtë për të pasionuarit e zhytjeve: në 20 metra thellësi mund të vizitohen me lehtësi pesë katet e anijes, kabina e drejtimit ku ende ekziston busulla dhe dhomat hiperbarike.
- Cormoran në Mikronezi
Anija Cormoran është shumë pranë relikes së “San Francisko Maru”, e cila gjendet e renditur më poshtë. Nuk bëhet fjalë vetëm për një anije të madhe prej 88 metrash gjatësi, por vlen të përmendet se vendi ku ajo gjendet është i vizitueshëm nga shumë të pasionuar të historisë. Cormoran u përmbyt në vitin 1917, gjatë Luftës së Parë Botërore. Në vitin 1975 ajo u bë pjesë e Regjistrit Kombëtar të Vendeve Historike.
- Eduard Bohlen në Afrikë
Kjo relike nuk gjendet poshtë ujit, por gjithsesi nuk është e lehtë për ta vizituar: autori i fotografisë ka thënë se për ta parë, iu desh të merrte një licencë dhe të shoqërohej nga një guidë në bordin e një automjeti të veçantë. Eduard Bohlen në fakt ngeci në rërën e “Bregut të skeleteve” afrikane (një plazh në Namibi, i quajtur kështu simbolikisht për nga shkretia që mbizotëron), në vitin 1909 për shkak të një mjegulle të dendur. Edhe kjo relike prej 95 metrash është vërtet mbresëlënëse: ajo gjendet 800 metra larg nga plazhi.
- Yongala në Australi
Kjo anije prej 107 metrash u përmbyt rreth 30 metra larg nga bregu australian. Thellësia dhe rrymat e forma, tipike të zonës, e bëjnë atë një “pre” vetëm për ekspertët. Në të jetojnë peshq të shumtë të bardhë, gjarpërinj detesh, breshka etj. Anija u fundos bashkë me pasagjerët në vitin 1911 prej një cikloni të madh. Mbetjet e saj u gjetën vetëm 40 vjet më vonë.
- Thistlegorm në Detin e Kuq
Thistlegorm zë vendin e relikeve më të pasura të këtij klasifikimi të veçantë: e fundosur në Detin e Kuq vetëm pas një viti nga përurimi, gjatë një udhëtimi që transportonte mallra nga Anglia drejt Afrikës së Veriut. Pjesa më e madhe e saj është ende e paprekur që nga viti 1940. E zbuluar më 1996, ajo ka mundur të tërheqë vëmendjen e shumë turistëve.
- San Francisko Maru në Mikronezi
Edhe japonezja San Francisko Maru u fundos me ngarkesa të tilla si tanke, kamionë, municione etj. Në foto, për shembull, duket qartë një tank që i përket Luftës së Dytë Botërore. Më 1943, anija po udhëtonte në ujërat e Mikronezisë, kur papritmas u godit nga një minë. Që prej asaj kohe, relikja prej 135 metrash gjatësi gjendet në thellësinë e Oqeanit Paqësor dhe është një nga më spektakolaret.
- Generale Hoyt Vandenberg në Florida
Kjo anije, 160 metra e gjatë, u përurua me udhëtimin në vitin 1943 për marinën ushtarake, duke transportuar ushtarë përmes Oqeanit Atlantik. Kur doli në “pension” nga ushtria, u mor me qira nga disa bamirës nga Key West në Florida për ta përdorur në favor të rritjes së ekonomisë lokale. Ndërkohë, në vitin 1993 u përdor për xhirimet e një filmi të zhanrit fantashkencë.
- Coln në Skoci
Anija e fundosur Coln është një destinacion i mirë për zhytësit e patrembur: ajo gjendet 36 metra e thellë në ujërat e ftohta skoceze, ku edhe gjatë muajve të nxehtë të vitit, temperaturat nuk shkojnë më shumë se 15 gradë. Ajo u përdor për nevojat e Luftës së Parë Botërore, derisa u braktis në brigjet e Skocisë. Bëhet fjalë për një nga reliket më të vjetra ujore. E ndërtuar në shekullin XX, jehona e saj historike, për sa i përket brendësisë së saj, vazhdon ende e kësaj dite.
- Coolidge në arkipelagun oqeanik
E quajtur ndryshe Presidenti Coolidge, anija në fjalë është një nga më të gjatat në botë: e përfunduar në vitin 1993, ajo paraqiste një transatlantike luksi prej 200 metrash gjatësi. Ajo u përdor kryesisht si anije ushtarake, por pas disa vitesh u fundos për shkak të shpërthimit të disa minave. Që nga kohërat e dy luftërave botërore, relikja në fjalë gjendet në Espiritu Santo (Shpirtin e Shenjtë), një ishull në arkipelagun oqeanik. Ajo tashmë përbën një atraksion të mrekullueshëm: mund të arrihet që nga plazhi i ishullit deri në 20 metra thellësi.
- Titanik në Kanada
Në këtë klasifikim nuk kishte se si të mungonte një nga reliket më të famshme në botë, që për miliona adoleshentë të viteve ’90 u bë simboli i një prej historive më të bukura të dashurisë! Për ndërtimin e transatlantikes britanike u deshën 10 vjet, ndërsa ajo u fundos në vitin 1912 për shkak të përplasjes me një ajsberg gjatë udhëtimit të saj “vajzëror”. Incidenti provokoi vdekjen e më shumë se gjysmës së pasagjerëve. Aktualisht gjendet në brigjet e Terranovës, një ishulli kanadez.
Burimi: Curiosone
