Remi: Mos e përdorni kohën e lavdisë, misioni i UÇK-së përfundoi në vitin 1999
Ish-komandanti i UÇK-së, Rrustem Mustafa-Remi, i cili ka dorëzuar mandatin e deputetit, është përfshirë në debatin, lidhur me aktakuzat e reja ndaj ushtarëve të UÇK-së.
Përmes një postimi në Facebook, Remi ka thënë se “thurja e lëvdatave apo hetimet mbi atë se çfarë ka ndodhur para 18 vitesh, nuk mundet të ndikojë në kualitetin e jetës së qytetarëve tanë”, transmeton Telegrafi.
Postimi i plotë i Rrustem Mustafës:
“UÇK-ka përfunduar misionin me sukses në 1999.!
Vetëm falë organizimit vendor politik dhe ushtarak UÇK-së, sot gëzojmë lirinë… tjerat vijnë pas si mbështetje e kohës…
Askush s’do të duhej të përdorte shkronjat UÇK-UÇK, apo kohën e lavdisë..
Thurja e lëvdatave apo hetimet mbi atë se çfarë ka ndodhur para 18 vitesh, nuk mundet të ndikojë në kualitetin e jetës së qytetarëve tanë.
Vazhdimisht sfidohemi nga krimet ekonomike, korrupsioni, nepotizmi dhe mafiat përtej kufinjëve kombëtar…
Hapja e rrugës për ndërtim të shtetit të së drejtës, duhet t’i eleminojë grupet vendore apo edhe ato ndërkombëtare të natyrës kriminale.
Ne duhet të ndërtojm shtetin e suksesit duke mos justifikuar mospunen dhe dështimet tona me kohët e vjetra si ajo e okupimit,organizimit të luftës apo edhe lëvizjeve politike klandestine.
Ecja e drejtë shtetit të suksesshëm, mund të bëhet.!”(sic.), ka shkruar Remi.
