Rrahën të riun në Korçë, përjashtohen nga policia zv/drejtori Hyseni dhe 2 efektivë

Policia e Shtetit ka përjashtuar nga radhët e saj zv/drejtorin e Policisë së Korçës, Arben Hyseni i cili disa ditë më parë u përfshi në një incident me një të ri në qytetin e Korçës, pasi ky i fundit i kishte gërvishtur makinën.

Bashkë me Hysenin janë përjashtuar, pas pezullimit, edhe 2 efektivët Nevzat Blushi dhe Robert Memelli të cilët u filmuan teksa dhunonin në mes të rrugës 33-vjeçarin Tomi Misha, pasi ky i fundit kishte goditur makinën e nëndrejtorit të policisë së Korçës, Arben Hyseni. E gjithë skena zhvillohet në prani të nëndrejtorit të policisë, ndërkohë që sipas familjarëve të 33-vjeçarit, ky i fundit e kishte dhunuar të riun edhe në ambientet e komisariatit pas aksidentit me makinën e tij.

Shërbimi i Çështjeve të Brendshme e Ankesave në policinë e shtetit bën me dije se lidhur me këtë ngjarje vijon hetimin penal.

Ngjarja e ndodhur pak ditë më parë solli reagimin e publikut dhe të drejtorit të përgjithshëm të policisë së shtetit, Artan Didi i cili zhvilloi menjëherë një takim me shefat e komisariateve në rrethe, të cilëve u kërkoi tij të tregojnë respektin ndaj qytetarit pasi kjo sipas tij, pasqyron punën e tyre në komunitet.