Ruçi dekorohet me medaljen “Urdhri i Lirisë” nga Presidenti Thaçi
Kryeparlamentari i Shqipërisë Gramoz Ruçi i cili po qëndron për vizitë në Kosovë është pritur edhe nga Presidenti Hashim Thaci, i cili e ka dekoruar me medaljen “Urdhëri i Lirisë”.
Në njoftimin e lëshuar nga Zyra e Presidentit pas takimit thuhet se Presidenti Thaçi e vlerëson lart rolin dhe kontributin e kryeparlamentarit Gramoz Ruçi në të gjitha legjislaturat e mëhershme të Parlamentit të Shqipërisë, si dhe angazhimin e tij për lirinë dhe pavarësinë e Kosovës.
“Duke vlerësuar rolin e pazëvendësueshëm të Shqipërisë për lirinë dhe pavarësinë e Kosovës, për kontributin tuaj personal, unifikues dhe bashkues për gjithë spektrin politik në Shqipëri, në mbështetje të përpjekjeve të jashtëzakonshme në kohën e luftës, por edhe në përpjekjet e tranzicionit demokratik në Kosovë, të shpalljes së pavarësisë dhe gjithashtu edhe tash e di se Kosovën e keni një nga prioritetet kryesore kudo që shkoni si Kryetar i Kuvendit të Republikës së Shqipërisë, ua ndaj medaljen Urdhri i Lirisë”, ka thënë Thaci.
Ndërsa, Kryetari i Kuvendit të Shqipërisë, Gramoz Ruçi, theksoi se “kjo është dekorata e parë që merr dhe është me veçantë për të, sepse ia ndan Presidenti i Kosovës”.
“Këtë vlerësim që ju bëni, e bëni për të gjithë spektrin politik shqiptar, pasi kanë qenë të gjithë deputetët shqiptarë, të gjitha partitë politike shqiptare, në fund të fundit kanë qenë të gjithë shqiptarët, që ëndrra e madhe e lirisë dhe pavarësisë së Kosovës të bëhet realitet”, ka thënë Kryetari i Kuvendit të Shqipërisë, Gramoz Ruçi.
Po ashtu gjatë takimit Thaçi dhe kreu i legjislativit të Shqipërisë kanë folur edhe për bashkëpunimin ndërmjet Kosovës dhe Shqipërisë, si dhe “koordinimin e ndërsjellë për përfaqësim sa më të mirë të shqiptarëve në botë”.
