Serbia kërkon garanci se Greqia nuk do të njohë Kosovën, Daçiç do takohet me Kotzias

Ministri i jashtëm serb, Ivica Dacic ka deklaruar se shteteve europiane që nuk e kanë njohur ende Kosovën, po u bëhet presion që të ndryshojnë qëndrim. Sipas tij, presioni është “mbytës”, sidomos ndaj Greqisë dhe Rumanisë. Dacic i ka thënë gazetës serbe “Novosti” se “objektivi primar i Serbisë është që Greqia, Rumania, Spanja, Sllovakia dhe Qipro të mos ndryshojnë qëndrim në çështjen e Kosovës”.  Dacic ka shtuar se e konsideron të sigurt që Spanja, Qipro dhe Sllovakia nuk do ta njohin Kosovën, ndërsa për Greqinë dhe Rumaninë ka thënë se pozicioni i tyre është i “brishtë”. Dacic tha se do të takohej me ministrin e jashtëm grek, Nikos Koztias, nga i cili, siç theksoi, pret të marrë garanci se Athina nuk do të ndryshojë qëndrim në çështjen e njohjes së Kosovës. Në Athinë lajmi është përcjellë nga mediat vendase pa asnjë lloj komenti shtesë, ndërsa nuk ka ndonjë reagim apo njoftim nga ministria e jashtme greke.