SHBA, arrestohet shqiptari që shtirej si agjent i FBI

Një shqiptar u arrestua në Shtetet e Bashkuara të Amerikës, pasi mashtronte qytetarët duke u hequr si agjent i FBI-së dhe duke përfituar shuma të mëdha parash për shërbimet që kryente si ‘agjent’.

Gjergj Pelushi 28 vjeç, u akuzua për mashtrim nga gjykata në Melrose të Masaçusets. Ai kishte mashtruar dy persona, të cilëve u kishte marrë 27, 700 dollarë dhe një makinë, që ishte me origjinë nga Shqipëria, transmeton shekulli.

Gjatë intervistave me agjentët e FBI, viktimat deklaruan se Pelushi bënte premtime të mëdha, thoshte se kishte lidhje me FBI si dhe me CIA-n, dhe premtonte se do t’i ndihmonte ata për t’i punësuar në FBI, në këmbim të mijëra dollarëve.

Pavarësisht kërkesës së prokurorisë për arrest me burg, gjykata vendosi ta lërë Pelushin në arrest shtëpie për shkak të gjendjes së tij shëndetësore, pasi 28-vjeçari është në pritje të një transplanti të dyfishtë në mushkëri.

Në lidhje me mashtrimin shtetasi shqiptar mund të dënohet deri në tre vjet burg.