Shqipëri-Kosovë, Rama: Hapësirë mbarëkombëtare në rajon
Marrëdhëniet mes dy shteteve shqiptare në rajon janë në një fazë historike të thelluara në të gjitha fushat, por që ka ende për të bërë.
Kështu deklaroi kryeministri Edi Rama në fjalën e mbajtur në mbledhjen e përbashkët të dy qeverive, që po zhvillohet në Prishtinë. Rama veçoi bashkëpunimin në energjitikë, shkëmbime tregtare, bujqësi dhe kulturë.
“Linja e interkonjesionit Shqipëri-Kosovë përfundon javën tjetër. Prioritet është lidhja e Kosovës përmes territorit të Shqipërisë. Në dy vjet kemi ngritur treg të përbashket bujqësor dhe kemi bërë njehsim standardesh. Kalendari i përbashkët kulturor tashmë është një realitet dhe kemi konkretizuar marrëveshjen në polici e turizëm”, tha Rama.
Si shenjë e forcimit të bashkëpunimit, Rama veçoi rritjen e shkëmbimeve tregtare mes dy vendeve, që për herë të parë ka prekur 200 mln euro, ndërsa tha se janë duke u ndërmarrë hapa konkrete për hapjen e një pike doganore të Kosovës në Portin e Durrësit.
“Të konsolidojmë themelet e një hapësire mbarëkombëtare në rajon”, u shpreh ai.
Rama kërkoi edhe respektimin e të drejtave të shqiptarëve në Luginën e Preshevës.
“Shqiptarëve në Luginën e Preshevës duhet t’u njihen të drejtat si minoritet, ashtu siç u njihen minoriteteve në Kosovë dhe Serbi”, tha ai.
Sa i takon Maqedonisë, Rama përsëriti qëndrimin se dy vendet mbështesin rrugën e integrimit të saj, por kërkoi që të zbatohen të drejtat e shqiptarëve atje.
