Shqipëria synon thellimin e bashkëpunimit me operatorët turistikë italianë

Zëvendësministri i Zhvillimit Ekonomik, Turizmit, Tregtisë dhe Sipërmarrjes, Ervin Mete, priti të enjten në një takim një grup operatorësh turistik italianë, të cilët shoqëroheshin nga Presidenti i Shoqatës Shqiptare të Turizmit, Enver Mehmeti.

Zv.ministri Mete shprehu kënaqësinë për vizitën e operatorëve turistik italianë në Shqipëri dhe i njohu ata me disa nga zhvillimet kryesore në sektorin e turizmit. Ai theksoi faktin se me miratimin e ligjit të turizmit hapet procesi i standardizimit dhe certifikimit të strukturave akomoduese, ndërkohë që krijohen dhe procedura lehtësuese për investimet madhore në fushën e turizmit. Ai theksoi faktin se Shqipëria ka interes në zhvillimin e butik resorteve apo marinat përgjatë vijës së saj bregdetare.

Ndërkohë ekspertë të Agjencisë Kombëtare të Turizmit bëne një prezantim të Shqipërisë si destinacion turistik, pikat kryesore dhe veçoritë e saj turistike. Në prezantim u theksua pozicioni i mirë gjeografik i Shqipërisë, vija bregdetare, mikpritja, pasuritë kulturore që mbrohen nga UNESCO (Berati, Gjirokastra dhe Butrinti), isopolifonia, turizmi malor, etj. Ndërkohë që u shpreh gatishmëria për thellimin e bashkëpunimit me tur operatorët italianë.

Për presidentin e Shoqatës Shqiptare të Turizmit, Mehmeti, Shqipëria dhe Ballkani përbëjnë një potencial të madh turistik dhe tashmë është koha që vëmendja e turistëve të përqendrohet më shumë aty, ndërkohë që theksoi faktin se ka shumë kompani italiane në vendin tonë dhe se operatorët shqiptarë mund të mësojnë e këshillohen nga ata italianë.
Operatorët turistikë italianë u shprehën optimistë për suksesin e bashkëpunimit me operatorët shqiptarë.