Shtohen masat e sigurisë para ndeshjes së futbollit Kosovë – Izrael
Policia e Kosovës tha të shtunën se ka ndërmarrë masat për të siguruar mbarëvajtjen e ndeshjes së futbollit ndërmjet Kosovës dhe Izraelit, që zhvillohet të dielën në Prishtinë.
Kjo është ndeshja e parë e Izraelit, që nga sulmi i përgjakshëm i 7 tetorit i ndërmarrë nga grupi i militantëve të Hamasit, sulm që u bë shkak për ndërhyrjen e Izraelit në Gazë. Ndeshja fillimisht ishte planifikuar të zhvillohej me 15 tetor, por u shty për shkak të këtyre zhvillimeve.
Në një komunikatë të policisë së Kosovës thuhej se masat janë ndërmarrë “me qëllim të menaxhimit dhe mbarëvajtjes sa më të mirë të kësaj ndeshjeje sportive, e cila është interes nacional për vendin dhe sportin”.
Ekipi izraelit i futbollit arriti të premten në Kosovë nën masa sigurie.
Para mbërritjes Federata izraelite e futbollit postoi një video në rrjetin social X, i njohur më parë si Tëitter, në të cilën shihen lojtarët tek zbresin nga autobusi që po i dërgonte në aeroportin e Izraelit për t’u strehuar në anë të rrugës, me sa duket në mes të hedhjes së raketave në afërsi të tyre.
“Asgjë nuk do të na ndalë në rrugën tonë drejt Euro 2024”, thuhej në postimin e federatës.
Izraeli renditet i treti në grupin e parë të kualifikimeve për kampionatin e futbollit Euro 2024, pas Rumanisë dhe Zvicrës, por me dy ndeshje më pak. Ekipi kombëtar izraelit nuk është kualifikuar asnjëherë në ndonjë kampionat evropian që nga anëtarësimi në UEFA në vitin 1994, dhe tani do të duhet të luajë katër ndeshje brenda dhjetë ditësh në përpjekje që të sigurojë kualifikimin.
Kosova dhe Izraeli vendosën marrëdhënie diplomatike gjatë një takimi të nivelit të lartë ndërmjet Kosovës e Serbisë në Shtëpinë e Bardhë në shtator të vitit 2020, të organizuar nga ish presidenti amerikan, Donald Trump.
Kosova u bë vendi i parë evropian dhe vendi i parë me shumicë myslimane, që vendosi ambasadën në Jerusalem në vend të Tel Avivit, pas Shteteve të Bashkuara dhe Guatemalës.
Izraeli është vendi më i fundit që ka njohur pavarësinë Kosovën, e cila u shpall në shkurt të vitit 2008 më mbështetjen e Shteteve të Bashkuara dhe vendeve kryesore euro-perëndimore, ndërsa kundërshtohet nga Serbia dhe aleatja e saj Rusia.
*Pjesë të këtij materiali u morën nga agjencia e lajmeve Associated Press
