Skema e mashtrimeve me TVSH-në, Prokuroria kërkon 23 vjet për dy të pandehurit

Prokuroria e Rrethit Gjyqësor Tiranë kërkon dënimin me 12 vjet burgim për shtetasen Afërdita Hysa, ish-Drejtoreshë e Kontrollit në Drejtorinë e Tatimeve Tiranë, si edhe 11 vjet burgim për shtetasin Mirjan Beneja, administrator i disa shoqërive private fiktive, të cilët, në bashkëpunim me disa persona të tjerë, kanë ngritur një skemë mashtruese me rimbursimin e Tatimit mbi Vlerën e Shtuar (TVSH), me një dëm rreth 6 milionë euro.

Dy të pandehurit, Hysa dhe Beneja, akuzohen për “Vjedhje duke shpërdoruar detyrën”, të kryer në bashkëpunim; “Falsifikim të dokumentave” të kryer në bashkëpunim”; ‘Pastrimit të produkteve të veprës penale…”.

Gjykimi ndaj këtyre dy të pandehurve është zhvilluar me procedurë të shkurtuar. Ndërkohë në Gjykatën e Rrethit Gjyqësor Tiranë po zhvillohet gjykimi me procedurë normale edhe për 6 bashkëpunëtorët e tyre, 5 prej të cilëve ish-zyrtarë të Tatimeve Tiranë dhe njëri administrator kompanish private fiktive.