Son bën detyrën edhe në kombëtare, Korea e Jugut përmbys Portugalinë dhe kualifikohet

Sa i takon kronikës së ndeshjes, Portugalia e nisi në mënyrën më të mirë të mundshme teksa gjeti rrugën e rrjetës që në minutën e pestë me anë të Horta. Ky i fundit u lirua nga kundërshtarët dhe pas një pasimi të Dalot në zonë, nuk gaboi. Luzitanët i patën shanset edhe për të dyfishuar, megjithatë me kalimin e minutave, Korea e Jugut e mori veten dhe në të 27-tën barazuan shifrat pasi shfrytëzuan një goditje këndi.

Me barazimin 1-1 u mbyll pjesa e parë ndërsa në fraksionin e dytë, Korea e Jugut u shfaq më kërkuese në kërkim të golit të avantazhit, por portieri Costa i mohoi festën.

Megjithatë, në minutën e parë shtesë, një kundërsulm i Son bëri diferencën teksa lojtari i Tottenham pasoi për Hee-Chan që nuk fali para portierit Costa dhe i dhuroi kualifikimin të tijve.

Kështu, Portugalia dhe Korea e Jugut kalojnë për më tej dhe në fazën e 1/8-tave, luzitanët do të përballen me vendin e dytë të Grupit G (Brazili, Zvicra, Serbia dhe Kameruni), ndërsa koreano-jugorët luajnë me vendin e parë të Grupit G.

Kore e Jugut-Portugali 2-1

Kronika e ndeshjes:

90+6′ Goooool! Korea e Jugut kalon në avantazh, kundërsulm i Son që pason për Hee-Chan më këtë të fundit që mposht Costën

27′ Korea e Jugut barazon shifrat, shënon Kim

5′ Goooool! Portugalia gjen rrugën e rrjetës me anë të Horta, sulmuesi nuk fal nga fare pranë portës së Kim