Sot Franca vendos për fatin e Haradinajt

Sot pritet që të dalë para Gjykatës në Francë kryetari i Aleancës për Ardhmërinë e Kosovës, Ramush Haradinaj.

Avokati mbrojtës i Ramush Haradinajt deklaroi para dy ditësh se ka kërkuar lirimin me kusht të tij, deri në përfundimin e procedurave.

Haradinaj u arrestua në datë 4 Janar në bazë të një urdhër arresti ndërkombëtar të lëshuar nga Serbia, ku akuzohet për krime lufte në Kosovë.

Ministria e Drejtësisë në Serbi i ka dorëzuar të martën organeve të drejtësisë në Francë kërkesën për ekstradim të ish-kryeministrit të Kosovës, Ramush Haradinaj.

Tashmë fjalën e fundit do ta thotë drejtësia franceze, e cila do të vendosë nëse Haradinaj do të ekstradohet në Serbi, apo do të lirohet.

Presioni ka qenë i madh ditët e fundit, nga Kosova dhe Europa për lirimin e Haradinajt, por edhe nga Serbia ka lobuar fuqishëm, që kreu i AAK, të ekstradohet në Serbi.

Për lirimin e ish-komandantit të UÇK, nuk kanë munguar as protestat në Kosovë, Shqipëri, por edhe në shumë vende të Europës dhe Amerikës.