STAMBOLL – Erdogan: Turqia po përballet me valën më të egër të terrorizmit në historinë e saj

Turqia po përballet me valën më të egër të terrorizmit në historinë e saj, konfirmoi sot presidenti turk, Rexhep Tajip Erdogan, i cili premtoi ndëshkim rigoroz kundër rebelëve kurdë dhe grupit të Shtetit Islamik (ISIS) pas regjistrimit të sulmeve të fundit.

“Ne do të godasim këto organizata terroriste në mënyrën më të fortë”, u shpreh Erdogan gjatë një fjalimi publik në Stamboll, duke u bërë thirrje shtetasve turq të mobilizohen kundër këtij kërcënimi.

Presidenti turk islamiko-konservator Rexhep Tajip Erdogan ka vënë në pikëpyetje “sinqeritetin” e vendeve të Bashkimit Evropian në luftën kundër rebelëve të Partisë së Punëtorëve të Kurdistanit (PKK-së) duke denoncuar “hipokrizinë e tyre” në këtë drejtim.

“Si mund të përmendim termin “sinqeritet” ndërsa organizata terroriste (PKK) mund edhe të ndërtojë një tendë në Bruksel, përballë godinës së Këshillit Evropian”, deklaroi Erdogan në një fjalim publik në Stamboll, pasi një grup rebelësh kurdë morën përsipër autorsinë e dy sulmeve të fundit terroriste në Ankara.