SYRIZA kritikon kërkesën për votëbesim nga qeveria

Partia e majtë radikale greke, SYRIZA, kritikoi sot kërkesën për votëbesim në parlament nga qeveria aktuale e koalicionit.

“Votëbesimi që qeveria do të kërkojë në parlament do të jetë fals”, thanë burime pranë kësaj partie.

“Rënia e qeverisë po përshpejtohet”, theksuan ato. ”Votëbesimin e vërtetë do t’ia japë populli. Lëvizja e qeverisë është e provokuar nga paniku”, tha zëdhënësi i grupit parlamentar të SYRIZA-s, Panajotis Lafazanis.

Me një lëvizje të papritur, liderët e dy partive që formojnë koalicionin qeverisës në Greqi, kryeministri Antonis Samaras (”Demokracia e re” – qendra e djathtë) dhe zëvendëskryeministri Evangjelos Venizelos (PASOK – e majtë), vendosën të qetësojnë partitë e tyre dhe t’u japin fund zërave që kanë qarkulluar kohët e fundit për zgjedhje të parakohshme në vendin ballkanik.

Në një takim të zhvilluar dje në mbrëmje, Samaras dhe Venizelos vendosën të kërkojnë vetëbesimin e parlamentit duke siguruar në të njëjtën kohë që procedurat për zgjedhjen e presidentit të ri të vendit do të bëhen sipas të gjitha parashikimeve, përgjatë muajit shkurt, dhe jo më parë. Deputetët e dy partive, pikërisht në kohën e negociatave të vështira me përfaqësuesit e kreditorëve ndërkombëtarë (FMN, BE, BQE), do të thirren për t’u dhënë fund tensioneve politke.

Pas një marrjeje të mundshme të votëbesimit nga parlamenti, teorikisht, askush nuk mund të ankohet për vendimet e marra nga qeveria, të paktën deri në daljen e Greqisë nga kontrolli i rreptë i trojkës